ភ្នំពេញ៖ ព្រះមហាក្សត្រកម្ពុជា សម្ដេចបរមនាថ នរោត្តម សីហមុនី បានសម្រេចរាជទាននិមិត្តសញ្ញាថ្មីសម្រាប់ប្រើប្រាស់ជានិមិត្តសញ្ញាផ្លូវការនៃក្រុមប្រឹក្សាធម្មនុញ្ញ។

និមិត្តសញ្ញាថ្មីនៃក្រុមប្រឹក្សាធម្មនុញ្ញនៃព្រះរាជាណាចក្រកម្ពុជាមានរូបព្រះព្រហ្មមុខ៤ ដែលមុខនីមួយៗតំណាងឱ្យមេត្តា ករុណា មុទិតា និងឧបេក្ខា និងព្រះហស្ត៤កាន់កេតនភណ្ឌ ដែលកេតនភណ្ឌនីមួយៗតំណាងឱ្យការកកើត គម្ពីរក្បួនច្បាប់ សមានចិត្ត ការឧទិ្ទសកុសល ការចំរើនភាវនារកអំពើល្អ ផ្លូវធម៌ ផ្លូវលោក និងទឹកអម្រិតប្រោះព្រំឱ្យសុខសប្បាយត្រជាក់ត្រជុំ។

និមិត្តសញ្ញាថ្មីនេះនឹងត្រូវយកមកជំនួសនិមិត្តសញ្ញាចាស់ដែលបានប្រើប្រាស់តាំងពីឆ្នាំ២០០១ និមិត្តសញ្ញាថ្មីនេះនឹងត្រូវប្រើប្រាស់ជាផ្លូវការនៅរាល់ឯកសារផ្លូវការ និមិត្តសញ្ញា សក្កិ កន្លាស់បំពាក់លើភូសា/អាវ ដាក់នៅត្រា និងរូបសញ្ញា និងការប្រើប្រាស់ជាផ្លូវការក្នុងករណីផ្សេងៗទៀតតាមការចាំបាច់ចាប់ពីចុងឆ្នាំ២០២១តទៅ៕